Мод тарилтын хөтөлбөр

PINE+ төсөл нь энэхүү асуудлыг үржүүлгийн төв, жилд 1.1 сая хүртэл нийт тарьц үйлдвэрлэх хүчин чадлыг үе шаттай бүрдүүлж, үүнээс 940,000 хүртэл залгаастай тарьц бэлтгэх, 2027–2033 онд 1,500 га доройтсон хушин ойг нөхөн сэргээх, клон үрийн плантаци байгуулах, түймэр-хортны эрсдэлийн менежмент, орон нутгийн оролцоонд суурилсан хамгаалалтаар шийдвэрлэнэ. Залгалтын технологийг зөвхөн үрийн плантацид бус, нөхөн сэргээлтийн талбайд шууд ашиглаж, үрээр бойжуулсан тарьцтай харьцуулан амьдралт, өсөлт, эрүүл мэнд, үрлэлтийн хугацаа, өртөг-үр ашгийг олон жилийн хугацаанд үнэлнэ.

2027–2033 онд 1,500 га газрын экологийн үйл ажиллагааг сэргээж, төслийн төгсгөлд тарьцын амьдралтыг 85-аас доошгүй хувьд хүргэх, суурь судалгаа ба баталгаажсан аргачлалтай мониторингийн тогтолцоо бий болгохыг зорьж байна. Нүүрстөрөгчийн урьдчилсан сценарын тооцоог 7 дахь жилд 6,240 тCO₂, 40 жилийн төсөөллөөр 154,320 тCO₂ гэж тооцсон бөгөөд суурь тооллого, амьдралт, биомассын хэмжилт, хүлээн зөвшөөрөгдсөн коэффициентээр дахин баталгаажуулна.

Төсөл нь UNCCD COP17-ын “Restoring Land, Restoring Hope” сэдэв, Riyadh–Ulaanbaatar Action Agenda болон газар, ус, хүн, санхүүжилт, гангийн тэсвэржилтийн тэргүүлэх чиглэлтэй шууд нийцнэ. Төслийн төгсгөлд Монгол орны бусад доройтсон хушин ойд давтан хэрэглэх техникийн багц, санхүүгийн загвар, сургалтын тогтолцоо, гарал үүслийн мэдээллийн сан, үрийн тогтвортой эх үүсвэр бий болно.